بعد الهجوم على آية مكرم .. تامر حسني يرد برسالة

رد النجم الكبير تامر حسني على الهجوم الذي حدث بعد انتشار فيديو تنكره كمصور صحفي، ليفاجئ البلوجر آية مكرم في حفل زفافها.

 

وقال تامر في ستوري عبر حسابه الخاص على موقع "انستجرام" :"آية غير انها ناجحة وبنت محترمة وطموحة هي اصلًا من محبيني من وهي طفلة، ودايمًا كان بيجيلي منها رسايل من صغرها ان امنيتها اني أغني في فرحها ، وبعتتلي من فترة اني بالنسبة لها مثل اعلى في النجاح وبتستمد مني طاقة ايجابية بتفرحها وبتنجح بيها".

 

 

وأستكمل نجم الجيل رده على الهجوم قائلًا: "تخيل لو النجم أو الفنان اللى هو مثلك الأعلى ميكنش عندك مقدرة مادية إنك تجيبه يحييلك فرحك، ولأن الفنان دا صدق طاقتك اللى وصلته من حروف صغيرة، ولكن صادقة كل الصدق، فتساعد الظروف هى الأخرى ويتم إلغاء ميعاد مهم عندى من أطراف أخرى، لتأتى الظروف لتساعد ، وأصبح فاضى فى هذه الساعة، فأذهب دون مقابل لفرحة آية الطفلة اللى كبرت، وطول عمرها بتتمنى اللحظة دي، من خلال حروف بسيطة، فأروح وافرحها هى وعريسها الجميل الشاب الطموح المحترم هيمن، اللى محبش مثل أعلى واتعلق بيه من صغره ولقاه جانبه بيحققله أمنية من أمنيات حياته، مش هيفهم الكلام دا، بس دى علاقة صدق فى طاقات الحب، بيألف قلوبها ربنا، عشان الناس تفرح، والفرحة بتخليك مش فى كامل وعيك، من كتر ماأنت مش مصدق، ودا انا قولته فى أغنية "يافرحة"، يااااه مش مصدق، ربنا يرزقكم كلكم الفرحة دي، مبروك لحبايب قلبي اخواتى الصغيرين آية وهيمن، حب الناس الطيبة لفرحتكم ميتوصفش".

 

وردت البلوجر آية مكرم على رد النجم تامر حسني معلقة :"انسان قبل مايكون فنان، لما تامر حسني ينزل ويكتبلي كده اعمل ايه! ، رضاني بعد ما الناس كسرت بخاطري وكسرت فرحتي، ربنا يراضي قلبك زي ما راضيتني، اتعملت منك كتير ولسه بتعلم يا تامر".