لميس للحديدي تكشف تفاصيل حادثة عمرو أديب وتوجه الشكر لـ4 شباب

طمأنت الإعلامية لميس الحديدي الجمهور على الحالة الصحية للإعلامي عمرو أديب بعد تعرضه لحادث مروري مساء الثلاثاء الماضي.

وقالت الحديدي عبر برنامجها "كلمة أخيرة" المذاع على قناة "ON"، اليوم السبت: "عاوزه أتكلم في موضوع مالوش علاقة بالشغل، عاوزه أطمن كل الناس اللي بتسأل على عمرو بعد الحادثة الصعبة اللي تعرض لها مساء الثلاث الماضي، أنه الحمد لله بخير بشكل عام ربنا نجاه بأعجوبة الحقيقة لأن العربية اللي خبط فيها واللي وقفت فجأة، كانت محملة بأنابيب بوتاجاز فكان ممكن تنفجر في أي لحظة".

تابعت: "الدكاترة طمنونا على حالته عموما، لكن هو لسه بيعاني من آلام مبرحة غالبا من الكدمات والردود نتوقع إنها تاخد بعض الوقت، وإن شاء الله يحاول يرجع لجمهوره قريبا بإذن الله، لكن هو محتاج يستريح شويه علشان يقدر يرجع تانى، وأنا طبعا ماكنتش هقدر انزل الشغل أو أكون معاكم إلا وأنا مطمئنة عليه انه بيتماثل للشفاء وأن حالته تسمح أني اسيبه بعض الوقت، لأن في مثل هذه الأحداث دوري كزوجة بييجي قبل دوري كإعلامية ".

وجهت الإعلامية الشكر للجمهور ولكافة المسئولين في الدولة قائلة: " عاوزة أشكر كل الناس اللي سألوا علينا وعليه من أصغر حد لأكبر حد، من الجمهور البسيط اللي كان بيبعتلي رسائل ودعوات وشمع في الكنائس، لأكبر مسئولين في البلد بشكرهم جميعا، زملاءنا الإعلاميين، الفنانين من كل الوطن العربية، الدكاتره اللي كانوا بيكلموني ، مستشفى دار الفؤاد اللي أنقذت عمرو في اللحظات الأولى، و طبعا أصدقائي وأصدقاء عمرو اللي ما سابونيش لحظة واحدة باعتذار أني ماكنتش بارد علي الاتصالات، لكن ممتنين جدا لاهتمامهم، وحبهم اللي حسينا بيه".

كشفت لميس الحديدي، لأول مرة عن هوية أربعة شباب كان لهم دورًا كبيرّا في إنقاذ زوجها الإعلامي عمرو أديب للمستشفى وإنقاذه، قائلة: " أنا هنا سأخص بالشكر ٤ شباب بالاسم لأنهم هم دول اللي نقلوا عمرو المستشفى بعد الحادث مباشرة وفضلوا معاه لحد ما أنا وصلت مباشرة بعد الحلقة يوم الثلاثاء، المهندس مصطفى عزب، الدكتور كريم النحاس، دكتور طارق سلامة، المهندسة داليدا، الشباب دول أنا ما اعرفهومش، لكنهم تصادف وجودهم في نفس مكان الحادث ونقلوه المستشفى و فضلوا معاه لحد وصولي وكملوا معايا لحد ما اتطمنوا عليه، الشباب دول أنا صممت أخد أساميهم علشان أشكرهم بنفسي ، فيه لسه ناس محترمه بجد".

يذكر أن برنامج "كلمة أخيرة" تقديم الإعلامية لميس الحديدي ويذاع من السبت إلى الثلاثاء في تمام التاسعة على شاشة "ON".