شوبير: «اللي مش هيروح منتخب مصر في عهد كيروش مش هيدخله تاني»

تحدث الإعلامى أحمد شوبير، عن الانضمام لمنتخب مصر فى عهد البرتغالى كارلوس كيروش فرصة ذهبية بل ومتاحة لكل اللاعبين.

وأضاف شوبير فى تصريحات عبر برنامجه الإذاعى "60 % من اللاعبين الموجودين حالياً فى منتخب مصر لم يكن سينضموا للفراعنة إلا بوجود كيروش، مدرب جرىء ودبح القطة من بدرى وقت استبعاد شريف وأفشة".

 

وأكمل شوبير، "عتابى الوحيد هو إصراره على إشراك الشناوى 180 دقيقة رغم أننا مشفنهوش خالص فى ماتش لبنان والسودان، كان لازم يمنح فرصة للواعد محمد صبحى، بس مينفعش ننتقد كيروش على الفاضى والمليان ده مدرب صاحب مشروع ولازم نسانده ممكن نتعارض معه فى بعض القرارات، ولكن إجمالا هو شغال كويس جدا وحتى الآن لم يخسر مع المنتخب فى أى مباراة".

 

وتابع شوبير، "الولاد فى منتخب مصر لازم يمسكوا فى الفرصة لأن اللى مش هيروح منتخب مصر فى عهد كيروش مش هيدخله تانى، الراجل مش شايف ألوان ولا بيخاف من جمهور أحمر ولا أبيض ولا مدى ودنه للسوشيال ميديا خالص".

وأكد شوبير، "هنكسب الجزائر ولو واجهنا المغرب هنكسب بس لازم نلاعب الجزائر على الفوز عشان نبعد فى الفترة دى عن المغرب لضمان الصعود للمباراة النهائية".

وأضاف شوبير، "كان نفسى نسجل هدف سادس فى السودان عشان نفض الاشتباك مع الجزائر مبكراً، وبقولكم حمدى فتحى جاهز وإشراكه فى المباراة القادمة وجهة نظر فنية ".

وعن مصير كأس الأمم الأفريقية علق شوبير، "محدش فاهم حاجة، حتى ملعب المباراة الافتتاحية تم تأجيل تسليمه، ومحدش بقى عارف مصير البطولة فبلاش اجتهادات ونستنى قرار الفيفا مش قرار الكاف لاننا كلنا عرفنا أنه قرار الفيفا".