شوبير: يا بخت اللي عنده محمد صلاح و ميسى و رونالدو

وجه الإعلامى أحمد شوبير الإنتقاد لفكرة الهجوم علي محمد صلاح نجم منتخب مصر وليفربول الإنجليزى بسبب أى تصرف أو أداء.

وقال شوبير في تصريحات عبر برنامجه الإذاعي :" فى إيه يا جماعة يا بخت اللى عنده محمد صلاح ويا بخت اللى عنده ميسى ويا بخت اللى عنده رونالدو، لاعيبة كدا مش هتكرر، هتقولى صلاح مجبش أجوال كتير فى التصفيات دى هقولك استنى صلاح فى المرحلة الحاسمة مع المنتخب هيحقق الفارق وهفكركم".

 

وأضاف شوبير: "بستغرب الناس تقعد تشجع صلاح مع ليفربول وتتغنى بأهدافه ولمساته وتقولك فخر العرب وأهات على القهاوى شغالة ولما يجى مع منتخب مصر نقطع فيه ، صلاح ياجماعة نجم كبير أوى وهيكون ليه دور كبير مع المنتخب فى الماتشين المهمين اللى جايين ، وبفكركم هيكون كمان تريزيجيه رجع وخف من الإصابة ورمضان صبحى يعنى هيكون عندنا منتخب من نار".

 

وأكمل شوبير "أوعى تصدق حد يقولك إن صلاح بيتدخل ويقول فلان يلعب وفلان ميلعبش، صلاح لا يملك القوة لهذه التصرفات، لكن صلاح بيحب لاعيبة معينة وبيرتاح معاهم عادى يعنى ويقعد معاهم فى أوضته لكن الملعب مفيش الكلام ده".

وتابع شوبير "يا كيروش بطل تصريحات وواثقين فيك وفى ولادك كمل أرجوك، وبنصح حجازى والونش وفتوح وطارق حامد والننى ومصطفى محمد يخلوا بالهم من قصة الإنذار الثانى عشان بيترحل مش عايزين نفقد أى لاعب يا رجالة".

وأختتم شوبير "الشطارة يا صلاح أنك تخبى الأمن والبودى جاردات ومحدش يشوفهم مش ينزلوا الملعب لأ ده مشهد يزعل وأول واحد زعل منه هو صلاح نفسه لأنه شخص بسيط ومش بيحب التصرفات دى".