نشوى مصطفى تتنازل عن قضية التحرش بابنتها

قررت الفنانة نشوي مصطفي التنازل عن المحضر المحرر ضد ثلاث مواطنين قاما بالتحرش بابنتها علي أحدى الكباري بطريق المنصورية.

وقدمت نشوي مصطفي الشكر لكل الجهات المعنية بالدولة علي التحرك السريع في هذا الإمر مؤكدة أن مصر تشهد حاليا تغير كامل في كل المجالات وأضافت أنها لم تحرر محضر ضد هؤلاء الأشخاص من البداية ولكن لجنة إدارة الرصد والبيان هي من قام باللازم نيابة عني

وكتبت الفنانة نشوي عبر حسابها علي فيس بوك ""يوم طويل فى نهاية اليوم أحب أقدم كل الشكر والامتنان لمعالي النائب العام وللفاضل رئيس نيابة الهرم وللفاضل وكيل نيابة الهرم، بلدنا عظيمة بشرفائها وشكرا جزيلا وزارة الداخلية، إحنا مسنودين عليكم والله كتر ألف خيركم،بالمناسبة الطرق الجديدة والكاميرات اللي في كل مكان على الطرق والملصق الإلكتروني اكتشفت بالبرهان أنهم مش بس علشان يرصدوا مخالفات السرعة، الملصق والكاميرات حماية لينا من أي حد ممكن يبلطج، فيه كاميرات بتسجل كل التفاصيل ومفيش أي فرصة لأي بلطجة، بسبب العظمة اللي الطرق بقت عليها الحمد لله تم القبض على العربية باللي كانوا فيها في أقل من أربع ساعات".

وتابعت : "للأسف كلهم سنهم صغير، الهدف اتحقق إنهم هما وغيرهم عرفوا إن مصر اختلفت وكله متسجل وأن عندنا عينين صاحية بتحمينا ومحدش فوق القانون، يمكن آخر سطر ده يزعل بعض الناس اللي طلبوا مني استمر في القضية".

وأكدت: "حرصا على أمهات وأسر المتهمين وانهيارهم بأن ولادهم يتسجنوا أنا وابتغاء مرضاة الله تنازلت عن القضية عملاً بمبدأ العفو عند المقدرة، ربنا يهديهم، واللي طلبتوا من أهاليهم وهما بيعتذروا لبنتي إنهم يربوا عيالهم ويفهموهم معنى الرجولة، وإن أقل عقوبة للمتحرش باللفظ أو الإشارات الخادشة للحياة هي خمس سنوات طبقاً لقانون التحرش اللي أمر بتعديله سيادة الرئيس حفاظاً على حق بناتنا".

وأضافت: "حاجة تانية مهمة مكنتش أعرفها، أنا بالمناسبة معملتش محضر، أنا بس كتبت بوست هنا، واللي اتحرك بالنيابة عني كمواطنة مصرية إدارة الرصد والبيان والتوجيه بمكتب النائب العام، ودي إدارة موجودة مخصوص لمتابعة السوشيال ميديا وبيهتموا بأي مشكلة يكتبها أي مواطن وليهم أرقام تليفون نقدر نتواصل معاهم وهما اللي بيقوموا بإخطار النيابات المختصة نيابة عن أي مواطن تعرض لمشكلة"

 

واختتمت "نشوى" منشورها قائلة: "على فكرة أنا اتنازلت عن الجزء اللي يخصنا لكن حق الدولة مش من حقي أتنازل عنه وهما عندهم مخالفات كتير، وتحيا مصر من كل قلبي".