رحمة حسن عن أزمتها مع المنتج هاني أسامة: ”كنت محتاجة فلوس لعلاج والدي”

بعد الأزمة الأخيرة للفنانة رحمة حسن والمنتج هانى أسامة والمطالبة بمستحقاتها نشرت الفنانة رحمة حسن منشور لها عبر حسابها عبر "انستجرام "لتوضيح الأزمة حيث كتبت فى منشورها «أولاً كل الاحترام والتقدير للدكتور اشرف ذكي.. علي استجابته وسؤاله.. وأحب أوضح إن الفلوس إلي ليا عند هاني أسامة المنتج هي باقي اجري عن مسلسل سابع جار .. وكان ليا جزء كبير منها .. ولجأت للدكتور اشرف في ٢٠١٩ علشان يساعدني .. وحصل .. وأداني جزء بسيط من فلوسي»

 

وأضافت «وللعلم الوقت ده كان بابا تعبان وفي المستشفي وهاني أسامة كان عارف وقلتله إني محتاجة الفلوس أرجوك .. ورفض بعدها يديني فلوس من باقي اجري ومكانش بيرد علي رسايل أو مكالمات مني .. للأسف بابا أتوفي بعدها بكام يوم ..ومن ساعتها وأنا تعبانه ومش ناسيه هو عمل معايا إيه .. وكان صعب عليه إني أطلب تاني من دكتور اشرف انه يتدخل لان هاني مش بيستجيب أصلا».

 

وتابعت «أنا كنت تعبت من كتر مابطلب حقي وهاني بيتهرب .. بس بين كل فتره والتانيو كنت ببعتله رسالة أو اكلمه وبرضوا ما فيش حاجه .. كل ده بمنتهي الذوق والاحترام والرسايل موجوده معايا من ٢٠١٨ كله علي التليفون .. وطبعا الوقت بيعدي وأنا معنديش شغل ماعنديش دخل .. تعبت وبعتله تاني من كام يوم وقلتله .. وبرضوا ما فيش حاجه»

 

وأكدت «وكمان العقد بتاعي معايا ومخصوم منه الضرايب اللي دائما بدفعها علي اي عمل بشارك فيه من زمان .. العقد بتاعي علي مسلسل ٦٠ حلقه .. هاني صور وذاع ٦٧ حلقه يعني ليا كمان ٧ حلقات مش موجودين في عقدي وماختش عليهم كمان اجر و ماطلبتش بيهم اصلا بس هو عارف ..الفكره انه طلع ان في كذا شخص في الشغل مش انا بس، عندهم نفس الموقف مع هاني .. ويمكن بفلوس اكتر بكتير وفي نفس الموضوع والنقابات والقضيه وما الي ذلك»

 

ولفتت «أما بخصوص إن الدكتور اشرف طلب مني إني اروحله النقابة عشان نتكلم في الموضوع .. أنا قلتله إني مش عايزه اتعبه اكتر من كدا معايا .. خصوصا إني عارفه إني مش نقابيه واني بشتغل بتصاريح ومش عايزة أضيع وقته خصوصا انه ساعدني قبل كدا.. وكمان عشان عارفه ان هاني مش بيستجيب عشان هو منتج فا تبع نقابة تانية .. وكنت عارفه إن الدكتور اشرف كلمه قبل كدا في موضوع الفلوس ده و برضوا ماحصلش حاجه .. يعني لو كان عايز يدفع كان دفع من زمان»

 

وأوضحت «المسلسل أتذاع وخلص وهاني عمل بعده كذا عمل .. انا قلت للدكتور اشرف إني مش هاقدر أجي لأني تعبانه واني مش هاشيل البوست لحد ما خد فلوسي .. لأني بحاول أجيب حقي إلي بقالي ٣ سنين مش عارفه أجيبه.. شكرا لكل حد اهتم .. بس أنا حبيت أوضح إيه اللي بيحصل .. وشكرا لكل إلي ساعد والي بيحاول يساعد ..وللعلم أنا لسه ماخدتش فلوسي برضوا .. شكرًا.. وأخيرا .. لم أدلي بأي تصريح صحفي ولست مسؤوله عن أي كلام يكتب بالنيابة عني».