حلا شيحا تفتح النار علي ”تامر حسني” و”نقابة الممثلين” : هنيئا لي بشطبي والجزء الأخير من أجري لم أستلمه

وجهت الفنانة حلا شيحا رسالة جديدة الي تامر حسني ووسائل الإعلام ولزملائها بالوسط الفني ولنقابة المهن التمثيلية بعد الأزمة التي فجرتها بسبب كليب فيلم مش أنا الذي شاركت تامر حسني بطولته ونشرت حلا علي حسابها الشخصي بموقع تبادل الصور والفيديوهات إنستجرام الرسالة قالت فيها :حابة أشكر كل الناس الجميلة علي رسايلهم الجميلة المشجعة وحابة أشكر كل الصحافة اللي نشرت فتوى دار الإفتاء النهارده اللي موقفي هو نفس موقفها اللي بيوضح إن التمثيل و الفن عموما زي أي مهنة في الدنيا حلاله حلال وحرامه حرام.. وأنا لا أحب أن اكون جزء من اي نوع من التطرف سواء بإسم الدين أو بإسم الفن.. ولو نقابة المهن التمثيلية ترفض موقف دار الإفتاء الواضح فهنيئا لي بشطبها لعضويتي.

 

وأضافت : حبي للفن محدش يقدر ينكره ولا يزايد عليه.. أنا ماتكلمتش غير عن نفسي وبقدر كل زمايلي.. الزميل الوحيد اللي ذكرته هو اللي الموضوع أصلا متعلق بيه.. وعتابي ليه لحسن ظني بيه.. والعتاب في الملأ عشان الكليب في الملأ.

وبالنسبة للكلام غير اللائق عن الأجر.. كل اللي في المجال شاهدين إني كنت أعتذر عن عدد كبير من الأعمال الفنية وكنت بقبل أجور اقل مما يتناسب معي تعاونا مع صناع العمل.. وأصلا ما إستلمتش الجزء الأخير من أجري في الفيلم لما أتأخر نزوله جدا و بدأت اتغير وأصلّح.. لأن بصراحة الكلام عن (أجر كبير) ضحكني.

وتابعت : أنا فنانة بطبعي ومن صغري وكل اللي يعرفوني عارفين حبي للفن.. ودايما هعبر عن نفسي بمواهبي الفنية لما أحب لكن الجديد اني مش هاعمل كده على حساب اللي انا مؤمنه بيه بجد جوايا زي ما قولت مؤخرا.. انا لا اهاجم احد و لا احارب احد و لا انا افضل من احد و لا انصح احد قبل ما انصح نفسي اولاً و كلنا نخطئ مفيش حد معصوم من الخطأ …و بتمني الخير دايماً لكل الناس بما فيهم كل زمايلي و صناع العمل