«فتاة العمرانية» تروي تفاصيل التحرش بها: خدش حيائي وضربني بالقلم (فيديو)

روت ضحية التحرش " ليلى " المعروفة باسم فتاة العمرانية إعلامياً، تفاصيل تعرضها لواقعة التحرش أثناء عودتها من الدرس قائلة :" كنت راجعة من الدرس وأنا في ثانوية عامة وأثناء سيري في الشارع فوجئت بأحدهم يسير بجواري بسيارته واعتدى عليا لفظياً بألفاظ خادشة للحياء ..قلي كلام فظيع مش كويس .. وحاولت تجاوزه وإكمال سيري ".

 

وتابعت في مداخلة هاتفية خلال برنامج " كلمة أخيرة " الذي تقدمه الإعلامية لميس الحديدي على شاشة " ON" قائلة : " وعندما حاولت سؤاله بعد سبي وقلتله حضرتك بتكلمني أنا ؟ فوجئت بيه بيضربني بالقلم على وشي .

 

وأكملت: "كنت خايفة أوي منه وقررت مانزلش الشارع تاني وقتها، مضيفة:" تعرضت لمعاكسات قبل كده بس المرة دي كانت سباب وشتايم وضرب على وشي ووقتها أصبت بالصدمة والذهول إزاي أتضرب ؟ وماعرفتش أتصرف؟ لكن صاحبتي ساعدتني وأخدت رقم العربية ".

 

وحول ردود أفعال الشارع وقتها قالت:" سألوه أنت بتعمل كده ليه ؟ وهدوه ومشوه ورغم أني بنت المنطقة بس ماحدش وقف جمبي".

 

وأردفت: " بعد ماصاحبتي صورت رقم العربية قلت لماما وأخدت بعضي ونزلت أعمل محضر في القسم بتشجيع أمي واوبويا وأصحابي ".

 

وأكدت أنها كانت مرعوبة من الواقعة، قائلة: "قلت لنفسي لو الشخص ده ماتقبض عليه الشخص ده هيكرر فعلته معايا ومع بنات تانية وأكيد عملها ".

 

وحول مشاعرها بعد القبض عليه قالت : " مكنتش متخيلة يتقبض عليه بسرعة وبشكر كل الي دعمني ووقف جمبي وبشكر كل الناس وأصحابي وأهلي والشرطة ".

 

ووجهت رسالة للفتيات اللاتي يتعرضن للتحرش قائلة : " ماتسكتيش هيتجاب حقك وماتخافيش كنت الأول زمان بخاف أتكلم في مثل هذه المواقف لكن المرة دي اتحركت وماقدرتش اسكت بعد مامد إيده علي وماتوقعتش ده أبدا".