”ميشرفنيش أغني مع واحد زيك”.. القصة الكاملة لخناقة حمو بيكا و محمد شاهين

أثار الفنان محمد شاهين نجم ستار أكاديمي ضجة واسعة بعدما هاجم مطرب المهرجانات الشعبية حمو بيكا ، مشيراً إلى أنه قام بطرح أغنية مشتركة بينهما بعنوان "قلبى شايل وجع" عبر قناته الرسمية على موقع الفيديوهات الشهير"يوتيوب"، ما أثار غضبه واستفزازه من غدر بيكا به.

 

وقال "شاهين" خلال منشور له عبر حسابه الشخصي بموقع التواصل الاجتماعي الأشهر "فيسبوك": "أنا مش بتاع لايف وأتكلم بشكل رخيص على موضوع مهرجان مع حمو بيكا بس اللى عمله اسمه غدر وقلة قيمة، من فترة كلمنى حمو بيكا فى التليفون روحت وسجلنا تراك وبعديها بفترة لقيت بوستر نازل عند واحد من الناس اللى بتصمم البوسترات دى من غير ما اعرف، كلمت حمو بيكا قولتله إزاى قالى أنا هنزل فى العيد 6 أغاني".

 

وتابع: "بكلمه فى حقوق الأغنية أقل حاجة فى حقى يرد يقولى (أنا هاخد الحقوق كلها) على أساس إن النجم المحترم هيعرفنى بالناس على أساس أن النجم المحترم أنا شغال عنده رديت قولتله الكلام ده مش هينفع وقفلت معاه بعديها بعت لى مصمم البوستر، وقالى إن الأغنية مش هتنزل اتفاجئ النهاردة بنزولها بدون علمى على أساس إيه، أنا هعرف أجيب حقى كويس بالقانون".

 

وفي سياق متصل، علق "بيكا" على تصريحات "شاهين" ليخلي مسئوليته تماماً من طرح الأغنية مُشيراً إلى أنه أعلن سابقاً أنه قام بتأجيل طرح أغانيه تضامناً مع الشعب الفلسطيني، حيث قال: "بخصوص أغنية قلبي شايل وجع بتاعتي أنا ومحمد شاهين، أنا مطلبتش إن الأغنية دي تترفع، الأغنية دي اترفعت وأنا نايم لأني قبل ما أنام كنت عامل لايف إني مأجل شغلي بالكامل تضامنا مع إخواتنا في بلدنا الثانية فلسطين".

 

وتابع: "الأغنية تم فتحها والشير بدون علم مني، وأن الشركة المسؤولة عن السوشيال ميديا هي اللي فتحتها.. ملحوظة الأغنية دي أصلا مش من ضمن شغلى، وتحياتي لكل إخواتي وأهلي وجمهوري الكبير اللي بيحبني وبيسمعني في جميع محافظات مصر والوطن العربي انتم على راسي"، وذلك خلال منشور له عبر حسابه الشخصي بموقع التواصل الاجتماعي الأشهر "فيسبوك"

 

ولكن سرعان ما عاد "شاهين" ليعلق على كلام "بيكا" وأسلوبه في الحديث عنه مشيراً إلى أنه أهانه بشده بقوله "اللي اسمه محمد شاهين" حيث قال: "أمبارح المحترم بيقول عليا اللي اسمه محمد شاهين .. أنا هقولك حاجة واحدة يابني حسبي الله ونعم الوكيل في اللي فرضك علينا وعملك قيمة".

 

وتابع: "والله العظيم أنا روحت أغنى الأغنية دي بس قلة حيلة و فقدان أمل بس لكن من جوايا و انتم عارفين لا شكلى و لا فني اللى بحبه عشان أروح أعمل كدة دى كانت غلطة و ذلة منى فقط لا غير وأنا مايشرفنيش أغنى مع حد مش مقدرنى و مش على دراية بأى شئ ولا يفقه فى المزيكا أى حاجة كمان غلطة وأنا هجيب حقى كدة كدة .. واستنوا منى اللى دايماً متعودين منى عليه".

 

على صعيد آخر، تفاعل جمهور الثنائي مع الأزمة، حيث أشار البعض إلى أنها قصة مفتعلة بهدف عمل دعاية مجانية للأغنية التي تم طرحها، و دخول التريند من أوسع أبوابه فجاءت أحد التعليقات كالآتي: "تريند جديد ده يانجم هو ينزل بوست هجوم وأنت تنزل بوست هجوم والأغنية تتسمع أكثر من المغفلين اللي هما أحنا".