أم كلثوم والقصبجي ورامي بمقهي ريش بوسط البلد مع عمرو الليثي

يتناول الإعلامي الدكتور عمرو الليثي والفنان أحمد صيام في الحلقة اليوم الأربعاء التاسع من شهر رمضان من برنامج " رمضان المصري علي القهوة " عبر أثير الشرق الأوسط ، الحديث عن مفاجأة وهي أن كوكب الشرق أم كلثوم كانت بتقعد على القهوة و كانت تقابل عليها شعراء وملحنين كبار ومنهم احمد رامي والقصبجي و السنباطي وغيرهم، وأشهر قهوة في وسط البلد كانت ام كلثوم بتنزل لها مخصوص من بيتها.

 

ويرد الفنان أحمد صيام : "مقهى ريش " ..ولما تنطقها لازم تقول مقهى ريش .. مش "قهوة ريش " ولو بالفرنساوي يبقى كافيه ريش .. لأنها أصلا اتعملت على الطراز الفرنساوي زي الكافية الأصلي الموجود في فرنسا.

 

 

ويعقب عمرو الليثي صاحب مقهي ريش كان راجل مثقف عظيم وعاشق لمصر اسمه برنارد تسينبرج وعمل كافيه ريش سنة ١٩٠٨ بالظبط بنفس طراز كافيه ريش الاصلي في باريس اللي كان برضه ملتقى المثقفين ، وبعد مرور عدة سنوات قام ببيعه لفرنسي عايش في مصر اسمه هنري بيير .. وبعدين اتنقلت ملكيته لأسرة مصرية بتملكه حتى الآن.

 

ويعقب الفنان احمد صيام : انا سمعت من كام سنه انه كان هايتقفل عشان يتعمل مكانه محل تجاري بس اصحابك المثقفين عملوا حملة كبيرة وقالوا ميصحش لان ريش مش بس مقهى .. دا لها تاريخ كبير في الحركة الوطنيه ايام ثورة ١٩ والشباب اللي كانوا بيطالبوا بالاستقلال عن الانجليز كانوا مخبيين فيها مطبعة بيطبعوا عليها المنشورات ..

 

ويشير عمرو : مقهى ريش موجود في العديد من البلدان العربية الاخري ومنها تونس والمغرب والجزائر لانها اتشهرت في العالم العربي بعدما اصبحت ملتقى لكل المثقفين العرب القادمين الي مصر ..

 

ويعقب صيام : آه والله وكانوا بييجوا ايام للمحروسه عشان يقعدوا مع طه حسين وتوفيق الحكيم ويحى حقي اللي قعدوا عليها في الاربعينات وبعد كده صلاح جاهين وسعاد حسني واحمد زكي وشلة الحرافيش احمد مظهر وعلي سالم وتوفيق صالح وجمال الغيطاني والاديب مكاوي سعيد اللي عمل عنها كتاب جميل ..

 

البرنامج يكتبه الكاتب الصحفي محمد الشبّه، ويخرجه الإذاعي تامر حسني.

 

يذاع برنامج " رمضان المصري علي القهوة " في الساعة ٥:٢٥ عصراً قبل الإفطار، من الأحد إلى الخميس خلال شهر رمضان، ويعاد إذاعته في الساعة 9:10 صباحا.