سد النهضة.. وزير الري: بدون المفاوضات هتبقى مشكلة على الجميع

توقع الدكتور محمد عبدالعاطي، وزير الموارد المائية والري، أن تكون هناك مفاوضات أخرى مع أثيوبيا حول السد، واصفا ذلك بقوله «ده أمر أكيد»، فيما رد الإعلامي عمرو أديب: «أنت بتقول أكيد؟ بس هيبقى بعقد ومهر جديدين»، فرد الوزير ضاحكًا: «أيوة طبعا، أكيد».

وأضاف «عبدالعاطي»، خلال حواره في برنامج «الحكاية»، مع الإعلامي عمرو أديب، على شاشة «إم بي سي مصر»، أنه من مصلحة إثيوبيا قبل مصلحة مصر الوصول إلى اتفاق، «من مصلحة مصر وأثيوبيا والسودان الوصول إلى اتفاق، لو مفيش اتفاق هيبقى فيه مشكلة، المشكلة مش هتبقى على طرف واحد، بل مشكلة على الجميع».

وأوضح وزير الموارد المائية والري، أن عام 2015-2016، كان عام جفاف، ووصل لمصر من حصتها من المياه 35 مليار متر مكعب، بدلًا من الـ 55.5 مليار متر مكعب، وهذا بسبب الجفاف، «لو الملء بقى حصل في وقت جفاف، الـ 35 مليار متر مكعب شيل منهم كمان 13 مليار متر، يعني ممكن يبقى حوالي 20 مليار متر مكعب».

وتابع: «فترة الجفاف في عام 2015- 2016 مصر استطاعت امتصاصها، بس ده هيكون لو حصل ملء ثاني في فترة جفاف صدمة مزدوجة، لازم يكون عندنا قدرة كافية على امتصاص أغلبها».